Сомпраз, 40мг №1

Сипаттама

Дәрілік затты медициналық қолдану жөніндегі нұсқаулық

Сомпраз

Саудалық атауы

Сомпраз

Халықаралық патенттелмеген атауы

Эзомепразол

Дәрілік түрі

Вена ішіне енгізу үшін ерітінді дайындауға арналған 40 мг лиофилизат еріткішімен – 0.9 % 5 мл натрий хлориді ерітіндісімен жиынтықта

Құрамы

Бір құты препараттың құрамында

белсенді зат - 42.6 мг натрий эзомепразолы

(40.0 мг эзомепразолға баламалы),

қосымша заттар: динатрий эдетаты, натрий гидроксиді

Еріткіш: натрий хлориді, инъекцияға арналған су

Сипаттамасы

Ақтан ақ дерлік түске дейінгі лиофилизацияланған нығыздалған масса.

Фармакотерапиялық тобы

Ас қорыту жолы және зат алмасу. Қышқылдығы бұзылуымен байланысты ауруларды емдеуге арналған препараттар. Ойық жараға қарсыпрепараттар және гастроэзофагеальді рефлюксті (gastro-oesophageal reflux disease – GORD) емдеуге арналған препараттар. Протонды сорғы тежегіштері. Эзомепразол.

АТХ коды А02ВС05

Фармакологиялық қасиеттері

Фармакокинетикасы

Таралуы. Дені сау адамдарда тепе-тең концентрацияларда таралу көлемі дене салмағының әр кг шаққанда шамамен 0,22 л құрайды. Эзомепразол плазма ақуыздарымен 97%-ға байланысады.

Метаболизмі және шығарылуы. Эзомепразол Р450 (CYP) цитохромы жүйесінің қатысуымен толық метаболизмге ұшырайды. Негізгі бөлігі арнайы СYР2С19 полиморфты изотүрлердің қатысуымен метаболизденеді, мұндайда эзомепразолдың гидрокси- және десметилденген метаболиттері түзіледі. Қалған бөлігінің метаболизмі басқа арнайы CYP3A4 изотүрлерімен жүзеге асады; мұндайда плазмада анықталатын негізгі метаболит – эзомепразолдың сульфотуындысы түзіледі. Төменде берілген параметрлер негізінен CYP2C19 белсенді ферменті бар пациенттердегі (метаболизм тез болатын пациенттер) фармакокинетика сипатын көрсетеді. Жалпы плазмалық клиренсі препаратты бір рет қабылдағаннан кейін шамамен сағатына 17 л және қайталап қабылдағанда сағатына 9 л құрайды. Препаратты тәулігіне бір рет қайталап қабылдағанда жартылай шығарылу кезеңі 1,3 сағатты құрайды. Қайталап енгізген кезде «концентрация – уақыт» қисық астындағы ауданы (AUC) артады. Бұлай арту дозаға- және уақытқа тәуелді, бұл бауыр арқылы алғаш өткенде метаболизмінің төмендеу, сондай-ақ эзомепразолдың және/немесе оның құрамында сульфаты бар метаболитінің CYP2C19 ферментін тежеуінен туындаған жүйелік клиренсінің төмендеу салдары болып табылады. Препаратты тәулігіне бір рет күн сайын енгізгенде эзомепразол енгізулер арасындағы үзілісте плазмадан толық шығарылады, препараттың жиналып қалу үрдісі байқалмайды. Эзомепразолды 40 мг дозада вена ішіне қайталап енгізгенде плазмадағы орташа ең жоғары концентрация шамамен 13,6 мкмоль/л құрайды. Осыған ұқсас дозаларды ішке қабылдағанда орташа плазмалық ең жоғары концентрация 4,6 мкмоль/л құрайды. Эзомепразолды вена ішіне енгізгенде, оны пероральді түрде қабылдаумен салыстырғанда, жалпы экспозициясы біршама аз (шамамен 30%-ға) жоғарылайды. AUC мәнінің дозаға байланысты емес артуы эзомепразолды 30 минуттық инфузия (40 мг, 80 мг және 120 мг) түрінде вена ішіне енгізгеннен кейін, әрі қарай ұзаққа созылатын (сағатына 4 мг немесе 8 мг) 23,5 сағаттық инфузияда байқалады.

Эзомепразолдың негізгі метаболиттері асқазан қышқылының секрециясына ықпалын тигізбейді. Өзгермеген эзомепразолдың 1%-дан азы несептен табылады.

Пациенттердің кейбір топтарындағы фармакокинетикасының ерекшеліктері. Тұрғындардың шамамен 1-2%-да (метаболизмі баяу пациенттер) CYP2C19 ферментінің белсенділігі төмендеген. Мұндай пациенттерде эзомепразолдың метаболизмі, негізінен, CYP3A4 жәрдемімен жүзеге асады, 40 мг эзомепразолды тәулігіне бір рет қайталап қабылдағанда «концентрация – уақыт» қисығы астындағы орташа ауданы, CYP2C19 белсенді ферменті бар пациенттерге (метаболизмі жылдам пациенттер) қарағанда, 100%-ға жоғары болады. Метаболизмі баяу пациенттерде плазмадағы ең жоғары концентрациялардың орташа мәндері шамамен 60%-ға жоғарылаған. Білінген ерекшеліктер эзомепразолдың дозасына және қолдану тәсіліне ықпалын тигізбейді.

Егде жастағы (71-80 жас) пациенттерде эзомепразолдың метаболизмі елеулі өзгермейді.

Бауыр функциясының бұзылуы жеңіл және орташа пациенттерде эзомепразолдың метаболизі бұзылуы мүмкін. Бауыр қызметінің бұзылуы ауыр пациенттерде метаболизм жылдамдығы төмендеген, бұл эзомепразол үшін «концентрация – уақыт» қисығы астындағы ауданның екі еселенуіне әкеледі. Сондықтан бауыр функциясының бұзылуы ауыр пациенттерде эзомепразолдың ең жоғары дозасы тәулігіне 20 мг құрайды және оны арттырмаған жөн. Препаратты тәулігіне бір рет енгізген кезде эзомепразолдың және оның негізгі метаболиттерінің жиналып қалуға тенденциясы білінбейді. Бүйрек функциясы төмендеген пациенттерде фармакокинетикасына зерттеу жүргізілген жоқ. Бүйректер арқылы эзомепразолдың өзі емес, оның метаболиттері шығарылатындықтан, бүйрек функциясы бұзылған пациенттерде эзомепразолдың метаболизмі өзгермейді деп болжам жасауға болады.

Фармакодинамикасы

Эзомепразол омепразолдың S-изомері болып табылады және асқазанда париетальді жасушаларда қышқылдық сорғыны арнайы тежеу арқылы тұз қышқылының секрециясын төмендетеді. Омепразолдың S- және R-изомерлерінің фармакодинамикалық белсенділігі ұқсас болады.

Әсер ету механизмі. Эзомепразол әлсіз негіз болып табылады, асқазанның шырышты қабығының париетальді жасушаларындағы секреторлы өзекшелердің қышқыл ортасында шоғырланады және белсенді түрге көшеді және қышқыл сорғыны – Н⁺, К⁺- АТФаза ферментін тежейді, мұндайда базальді де, сондай-ақ қышқылмен стимуляцияланған секрециясы да тежеледі.

Асқазан қышқылы секрециясына ықпалы. Симптомдары бар гастро-эзофагеальді рефлюкс ауруына (ГЭРА) шалдыққан пациенттер эзомепразолдың 20 мг немесе 40 мг дозасын 5 күн бойы қабылдағаннан кейін 24 сағаттың орта есеппен 13 және 17 сағаты ішінде асқазанның рН мәні рН 4-тен жоғары болды. Фармакокинетикалық деректер талдамасы ішке қабылдағаннан кейін қышқыл секрециясының тежелуі мен препараттыңплазмадағы концентрациясы арасында өзара байланысты анықтауға мүмкіндік берді (концентрациясына баға беру үшін AUC – «концентрация-уақыт» қисығы астындағы аудан параметрі пайдаланылды).

Қолданылуы

пероральді емнің, оны жүргізу мүмкін болмағанда, баламасы ретінде вена ішіне енгізу үшін:

- эзофагиті және/немесе рефлюксті аурудың айқын симптомдары бар пациенттердегі гастро-эзофагеальді рефлюкс (ГЭРА) ауруында

- қабынуға қарсы стероидты емес препараттарды (ҚҚСП) қабылдаумен байланысты пептикалық ойық жараларды емдеуде және профилактикасында

- асқазанның немесе он екі елі ішектің жедел қан кетуін эндоскопиялық емдеуден кейін, пациенттерде қайтадан қан кетудің пайда болуының профилактикасында

Қолдану тәсілі және дозалары

Ересектер

Пероральді ем жүргізу мүмкін болмағанда пациенттерге Сомпраз тәулігіне 1 рет 20 - 40 мг дозада парентеральді түрде ұсынылуы мүмкін.

Рефлюкс-эзофагиті бар пациенттерге эзомепразол тәулігіне 1 рет 40 мг дозада ұсынылады. ГЭРА симптомдарын емдеу үшін Сомпраз тәулігіне 1 рет 20 мг дозада қолданылады.

ҚҚСП қабылдаумен байланысты пептикалық ойық жараларды емдеу және профилактикасы үшін Сомпраз тәулігіне 1 рет 20 мг дозада ұсынылады.

Әдеттегідей, венаішілік түрмен емдеу кезеңі ұзаққа созылмайды, пациентті мүмкіндігінше препаратты пероральді түрде қабылдауға тезірек көшірген жөн.

Инъекциялар

40 мг доза

Сомпраздың дайындалған ерітіндісівена ішіне кем дегенде 3 минут енгізіледі.

20 мг доза

Эзомепразолдың дайындалған ерітіндісінің 1/2 бөлігі вена ішіне кем дегенде 3 минут бойы енгізіледі. Ерітіндінің пайдаланылмаған қалдығы жойылуы тиіс.

Инфузиялар

40 мг доза

Эзомепразолдың дайындалған ерітіндісі 10 - 30 минут бойы венаішілік инфузия түрінде енгізіледі.

20 мг доза

Эзомепразолдың дайындалған ерітіндісінің 1/2 бөлігі вена ішіне кем дегенде 10 - 30 минут бойы енгізіледі. Ерітіндінің пайдаланылмаған қалдығы жойылуы тиіс.

Асқазанның немесе он екі елі ішектің жедел қан кетуін эндоскопиялық емдеуден кейін, пациенттерде қайтадан қан кетудің пайда болуының алдын алу

Асқазанның немесе он екі елі ішектің жедел қан кетуін эндоскопиялық емдеуден кейін препарат дозасы 80 мг құрайды, ол болюстік инфузия түрінде 30 минут бойы енгізіледі, содан кейін 3 күн бойы (72 сағат) сағатына 8 мг дозада ұзақ венаішілік инфузия жүргізіледі.

80 мг тең болюстік дозалар

Эзомепразолдың дайындалған ерітіндісі 30 минут ішінде венаішілік инфузия түрінде енгізіледі.

Сағатына 8 мг дозалар

Эзомепразолдың дайындалған ерітіндісі 71,5 сағат бойы ұзақ венаішілік инфузия түрінде енгізіледі (инфузияның есептік жылдамдығы – сағатына 8 мг).

Бүйрек функциясының бұзылуы

Бүйрек функциясы бұзылған пациенттерде Сомпраз дозасын түзету қажет емес. Эзомепразолды бүйректің ауыр жеткіліксіздігі бар пациенттерге қолдану тәжірибесінің шектеулі болуына байланысты, мұндай пациенттерді емдегенде сақ болған жөн.

Бауыр функциясының бұзылуы

Бауыр функциясының жеңіл және орташа ауырлықтағы бұзылулары бар пациенттерде Сомпраз дозасын түзету қажет емес. Бауыр функциясының бұзылуы ауыр пациенттерде ең жоғары тәуліктік доза 20 мг құрайды.

Егде жастағы пациенттер

Егде жастағы пациенттерде Сомпраз дозасын түзетудің қажеті жоқ.

Ерітінді дайындау

Инъекциялар

Инъекцияға арналған ерітінді вена ішіне енгізуге арналған 5 мл 0,9% натрий хлориді ерітіндісін ішінде Сомпраз бар құтыға құю арқылы әзірленеді. Дайындалған ерітінді мөлдір болуы тиіс, түрлі түсті гаммасы түссізден бозғылт-сарыға дейін өзгеріп отырады.

20 мг эзомепразолды тағайындағанда дайындалған ерітіндінің жартысы енгізіледі. Ерітіндінің дайындалмаған қалдығы жойылуы тиіс.

Инфузиялар

Инфузиялық ерітінді бір құтының ішіндегі Сомпразды венаішілік 100 мл 0,9%натрий хлориді ерітіндісінде еріту арқылы дайындалады.

20 мг эзомепразолды тағайындағанда дайындалған ерітіндінің жартысы енгізіледі.

80 мг инфузиялар. Инфузиялық ерітінді ішінде 40 мг-нан Сомпразы бар екі құтыдағыны вена ішіне енгізуге арналған 100 мл 0,9% натрий хлориді ерітіндісінде еріту арқылы дайындалады. Ерітіндінің пайдаланылмаған қалдықтары жойылуы тиіс.

Эзомепразолдың сұйылтылған ерітіндісі мөлдір, түссізден бозғылт-сары түске дейін болуы керек.

Дайындалған ерітінді (инъекцияға және инфузияға арналған) басқа дәрілік заттармен араластырылмауы немесе бірге енгізілмеуі тиіс. Ерітіндіні қолданар алдында, онда көзге көрінетін механикалық қоспалардың бар-жоқтығын және түсінің өзгерген-өзгермегендігін көзбен қарап, баға берген жөн. Тек мөлдір ерітінді ғана пайдаланылады. Ерітіндіні дайындап болысымен бірден енгізу керек (микробиологиялық көзқарас тұрғысынан).

Жағымсыз әсерлері

Жиі (>1/100, <1/10): бас ауыру, жүректің айнуы, іштің ауыруы, диарея, метеоризм, құсу, іш қату, фундальді без полиптері (қатерсіз), тромбофлебитті қоса, инъекция орнындағы реакциялар

Жиілігі аз (>1/1000, <1/100): дерматит, қышыну, есекжем, бөртпе, бас айналу, ауыз ішінің құрғауы, ұйқысыздық, парестезия, ұйқышылдық, “бауыр” ферменттері белсенділігінің жоғарылауы, шеткері ісінулер, артралгия, миалгия.

Сирек (>1/10000, <1/1000): лейкопения, тромбоцитопения, аллергиялықреакциялар, қызба, ангионевроздық ісіну, анафилаксиялық реакция/анафилаксиялық шок, қозу, депрессия, дімкәстік, абыржу, дәмнің бұзылуы, айқын көрмеу, гипонатриемия, ауыр гипомагниемия гипокальциемиямен өзара байланысуы мүмкін (гипомагниемия сондай-ақ гипокалиемиямен байланысты болуы мүмкін), бронх түйілуі, стоматит және асқазан-ішек кандидозы, сарғаюы бар (немесе онсыз) гепатит, фотосенсибилизация, алопеция, тершеңдік.

Өте сирек (<1/10000): агранулоцитоз, панцитопения, елестеулер (көбіне пациенттерде), озбырлық мінез таныту, бауыр жеткліксіздігі, бауыр ауруы бар пациенттердегі энцефалопатия, мультиформалы экссудативтік эритема, Стивенс-Джонсон синдромы, уытты эпидермальді некролиз, бұлшықет әлсіздігі, интерстициальді нефрит (кейбір пациенттерде бір мезгілде бүйрек жеткіліксіздігі байқалады), гинекомастия.

Белгісіз: микроскопиялық колит, жеделге жуық тері қызыл жегісі.

Жекелеген жағдайларда, омепразолды жағдайы қиын пациенттерге, әсіресе жоғары дозаларды вена ішіне енгізген кезде, көрудің қайтымсыз бұзылуына әкелгені мәлімделді, мұның препаратты қабылдаумен себептік байланысы анықталмаған.

Қолдануға болмайтын жағдайлар

- эзомепразолға, орын алмастыратын бензимидазолдарға немесе препараттың басқа да игредиенттеріне белгілі жоғары сезімталдық

- нелфинавирмен бірге қолдану

- лактация кезеңі

- балалар және 18 жасқа дейінгі жасөспірімдер (қауіпсіздігі және тиімділігі жөнінде деректердің жоқ болуымен байланысты)

Дәрілермен өзара әрекеттесуі

Эзомепразолдың басқа дәрілік заттардың фармакокинетикасына ықпалы

Эзомепразолмен және басқа ПСТ-мен емдеу аясында асқазан сөлі қышқылдылығының төмендеуі ортаның қышқылдылығына байланысты сіңетін препараттардың сіңуінің өзгеруіне әкелуі мүмкін. Эзомепразол, асқазанда қышқыл секрециясын төмендететін басқа да препараттар сияқты, кетоконазолдың, итраконазолдың және эрлотинибтің сіңуінің төмендеуіне әкеледі. Сол уақытта эзомепразолды дигоксинмен бірге қабылдағанда, соңғысының концентрациясы артуы мүмкін. ПСТ мен метотрексатты бірге қабылдағанда кейбір пациенттерде, метотрексат концентрациясының артқаны білінеді. Метотрексатты жоғары дозаларда қолданғанда эзомепразолды қабылдауды тоқтату қажет.

Атазанавир мен нелфинавир омепразолмен бір мезгілде қабылданған жағдайда осы препараттардың сарысудағы концентрацияларының төмендегені білінді, сондықтан оларды бірге қолданбаған жөн. Эзомепразолдың 40 мг дозасын тәулігіне бір рет және 300 мг атазанавирді/100 мг ритонавирді бірге тағайындау атазанавирдің AUC мәнінің, сондай-ақ ең жоғары және ең төмен концентрацияларының елеулі төмендеуіне әкелді. Атазанавирдің дозасын 400 мг-ға дейін арттыру атазанавирдің концентрациясына эзомепразолдың ықпалының орнын толтырған жоқ. Сондықтан эзомепразолды атазанавирмен бірге тағайындамаған жөн, ал эзомепразол мен нелфинавирді бір мезгілде тағайындауға болмайды.

Эзомепразол оның метаболизміне қатысатын негізгі - CYP2C19 ферментін тежейді. Эзомепразолды метаболизміне CYP2C19 қатысатын басқа, мысалы, диазепам, циталопрам, имипрамин, кломипрамин, фенитоин және т.б. сияқты препараттармен бірге қолдану осы препараттардың плазмадағы концентрациясының жоғарылауына әкелуі және дозаны төмендетуді қажет етуі мүмкін. 30 мг Сомпразды және диазепамды пероральді түрде бірге қабылдағанда CYP2C19 субстраты болып табылатын диазепамның клиренсі 45%-ға төмендейді.

Сомпраздың пероральді 40 мг дозасын және фенитоинді бірге қабылдағандаэпилепсиясы бар науқастарда плазмадағы фенитоиннің қалған концентрациясы 13%-ға жоғарылады. Осыған байланысты эзомепразолмен емдеудің басында және оны тоқтатқанда фенитоин концентрациясын бақылау керек.

Сомпраздың пероральді 40 мг дозасын варфарин қабылдап жүрген пациенттерге тағайындағанда коагуляция уақыты рұқсат етілген мән шегінде қалды. Алайда варфарин мен эзомепразолды бірге қолданғанда ХҚҚ (халықаралық қалыптастырылған қатынас) индексінің клиикалық тұрғыдан маңызды жоғарылауының бірнеше жағдайлары мәлімделді. Осыған байланысты осы препараттарды бірге қолданудың басында және оны аяқтағанда мониторинг жүргізу керек.

Эзомепразолдың 40 мг дозасын және цизапридті пероральді түрде бірге қабылдау “концентрация – уақыт” қисығы астындағы аудан (AUC) шамасын 32%-ға жоғарылатты және цизапридтің жартылай шығарылу кезеңін (t_1/2) 31%-ға арттырды; цизапридтің пламадағы ең жоғары шектегі концентрациясы мұндайда елеулі өзгеріске ұшыраған жоқ. Цизапридпен монотерапияда байқалған QT аралығының аздап ұзаруы, эзомепразолды қосқан кезде көбейген жоқ.

Эомепразолдың амоксициллин мен хинидиннің фармакокинетикасында клиникалық елеулі өзгерулерді тудырмайтыны дәлелденген.

Эзомепразолды вена ішіне үлкен дозаларда (80 мг + сағатына 8 мг) енгізгенде дәрілік заттардың өзара әрекеттесуіне in vivo зерттеулер жүргізілген жоқ. Метаболизміне CYP2C19 қатысатын препараттарға эзомепразолдың әсері препаратты вена ішіне енгізген кезде өте айқын болуы мүмкін, сондықтан жағымсыз әсерлерін дер кезінде анықтау мақсатында, вена ішіне енгізілген сәттен бастап 3 күн бойы пациентті жан-жақты бақылауға алған жөн.

Дәрілік препараттардың эзомепразолдың фармакокинетикасына ықпалы.

Эзомепразолдың метаболизміне CYP2C19 және CYP3A4 қатысады. Сомпразды және CYP3А4 тежегішін, кларитромицинді (тәулігіне 2 рет 500 мг) пероральді түрде бірге қолдану эзомепразолдың AUC мәнінің екі есе артуына әкеледі. Эзомепразолды және біріктірілген CYP3А4және CYP2C19 тежегішін, мысалы, вориконазолды бірге қолдану, Сомпраздың AUC мәнінің 2 еседен астамға артуына әкелуі мүмкін. Мұндай жағдайлардаСомпраз дозасын түзетудің қажеті жоқ. Алайда, ұзақ ем тағайындаған жағдайда бауыр функциясының бұзылуы ауыр пациенттерде дозаны түзету қажет болуы мүмкін.

Айрықша нұсқаулар

Үрей тудыратын кез келген симптомдар (мысалы, дене салмағының кездейсоқ едәуір жоғалуы, қайта-қайта құсу, дисфагия, қан аралас құсу немесе мелена), сондай-ақ асқазан ойық жарасы болғанда (немесе асқазанның ойық жарасына күдіктенгенде), қатерлі жаңа түзілімдердің бар-жоқтығын анықтаған жөн, өйткені Сомпразмен емдеу симптоматиканың бүркемеленуіне және аурудың анықталуының кейінге шегерілуіне әкеп соғуы мүмкін.

Сақтықпен: бүйректің ауыр жеткіліксіздігі бар пациенттерге. Протонды помпа тежегіштерімен емдеу Salmonella және Campylobacter әсерінен асқазан-ішектік инфекциялардың пайда болу қаупінің аздап артуына әкеп соғуы мүмкін. Антисекреторлық препараттарды ұзақ уақыт аралығымен қабылдап жүрген пациенттердің асқазанында безді кисталардың түзілгені жиі байқалады. Бұл құбылыстар қышқыл секрециясының айқын тежелуінің нәтижесінде болатын физиологиялық өзгерулерден туындайды. Кисталар қатерсіз және қайтымды сипатқа ие.

Жүктілік

Эзомепразолды жүктілік кезеңінде қолдану жөнінде деректер қазіргі таңда шектеулі. Препаратты жүктілік кезеңіндеана үшін күтілетін пайдасы ұрық үшін ықтимал қаупінен басым болған жағдайларда ғана тағайындау керек.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Дәрілік заттың жағымсыз әсерлерін ескеріп, көлік құралын немесе қауіптілігі зор механизмдерді механизмдерді басқарған кезде сақ болған жөн.

Артық дозалануы

Симптомдары: жағымсыз әсерлерінің күшеюі.

Емі: симптоматикалық. Арнайы антидоты белгісіз. Эзомепразол плазма ақуыздарымен байланысады, сондықтан диализдің тиімділігі аз.

Шығарылу түрі және қаптамасы

Препарат сұр резеңке тығынмен тығындалған және сұр түсті, «flip-off» типті қалпақшамен алюминий қақпақшамен қаусырылған, сыйымдылығы 5 мл I типті түссіз шыныдан жасалған құтыда.

Құтыға заттаңбалық қағаздан жасалған заттаңба жапсырылады.

5 мл еріткіштен тығыздығы жоғары полиэтилен ампулада.

1 құты және 1 ампула медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапқа салынған.

Сақтау шарттары

Құрғақ, жарықтан қорғалған жерде, 25°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндруші ұйымның атауы және елі

Sun Pharmaceutical Industries Ltd, Үндістан

Halol-Baroda Highway, Halol-389 350,

Gujarat, Үндістан

Тіркеу куәлігі ұстаушысының атауы және елі

Sun Pharmaceutical Industries Ltd, Үндістан

Қаптаушы ұйымның атауы және елі

Sun Pharmaceutical Industries Ltd, Үндістан

Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«Сан Фармасьютикал Индастриез Лимитед» Компаниясының өкілдігі

050008, Қазақстан, Алматы қ.

Манас к-сі 32 «А», «SAT», бизнес орталығы, 6 қабат, 602 кеңсе

Тел. (727) 22378450, 2378451

regulatory.kz@sunpharma.com

Дәріханалар

Қалалар